STVV in 't plat

KSTVV sènt 1924

De Sintruinse voetbalvereinigink is op den 23 feibrewoare 1924 ontston nooda twie ploege van hè, ’t is te zegge den FC Goldstar en den FC Union, gefusjoneird zin. De club kreig van de bond de stamnummerou 373 en kous ver de kluere van de stad, geel en blou. In 1965 wood de club vissekampiejoen. In 1971 en 2003 spelde STVV de beikerfinnoale.

Wéllekom op Staaien!

’t Ieste voetbalveld lag on den Tongersestieweg. De speilers moste de poale van de goul be èllek àntrenemènt of matsj in de grónd stéke, en ze dónó wirremal aattrèkke. Dó kwam wol nen nieuve plein on de Montenoakeweg, op de grond van de Fruitsentral, da ’s naa de Belgische Fruitveilink. In 1927 veruisde STVV no Staaien of Stóje, wa ’t plat Sintruins is van Staden. In den ielen aa tijd betiekelde da “ploats”. Dé grond was den eigendóem van ’t Sóekerfabrik. In 1937 prommóeveirde STVV nu virde klas. Vijfdúzent sepporters kwamme no Staaien ver de topmatsj teige Zwatberg. Den Twidde Wereldórlog was och malleruis ver Staaien.

E boembardement aat de locht vermàssakreirde e groewet stúk van den infrastruktuur. Vier joor dónó prommóeveirde STVV no ieste klas. V´tsje veur vútsje wóde de nieve tribunes opgetróekke. Spèètig genóeg góejde ze in dén tijd ter nogal fèl be ’t un klak eine. De tribunes stónte ieëlemòòl nè néve mekaander en op den óep taa tróeke ze och ieëlegans nè op mekaander. In 2003 wóód den aftrap gegéve ver de vernieving van Staaien. Van de groeëte tribun wood de “bussines”-tribun gemokt. Op de ploats van de klein stóntribun wood en zittribun opgetroeke be mar liefst vijfdúzent zitsjes en ver kantines. De spoase onder de tribun wit verùùrt. Kerjuis, ma na koen dzje och serjuis gon wienkele op Staaien.

  

20.000 toeschouwers

Da klein clubke aat Sintruin zùrregde in ’t sezoen 1965-1966 ver noewet gezien vúrwerk. Mier dan 20.000 man (en vroulie) euverrroempelde ’t stadion ver de topmatsj teige de kiekefretters, RSC Anderlecht. Eigelèk wore do mar 14.000 ploatse. De sepporters kroupe op de toures van ’t licht, goenke op de doake van de tribunes zitte en plasseire un zellevèrs gelèk eerienke in en ton op ’t veld tot teige de witte strieëpe.

  

Goethals en Polleunis

Op Staaien zin do nen ieëlenóep groeëte noame den revue gepasseird. Nemt na mar pàr ekzèmpel Marc Wilmots, Danny Boffin, Fritz Van Den Boer, Alfred Riedl, Kogelke Appeltans, Marcel Lemoine, enzoevots. De twie groeëtste zin Raymond Goethals en Lon Polleunis. STVV gaf Raymond Goethals, dé promueseclub Waremme àntrenneirde, de sjoaas ver zen kàppasetèète och uns op ’t oëgste nivau te loate zien. Goethals wood al rap den toevenéér van Staaien be as krèm-fòetei op de gatou de twide ploats in 1965. Nó STVV wood ter assistent-bondscoach van de Roei Dúvels. Goethals kreig nog mier noam en rippetoase be onder aandere Anderlecht, Standard en Marseille. Lon Polleunis is zeiker en vast de beste voetballist dé ter oewet op de Truiense voetbalvelden ei rondgeloepe. En súrtoe ei dee gebouren en getougen Truieneer dan och nè verniks de “Goude Schoen” gekreige..

Met dank aan Rudi Festraets